Ministrja e Ministrisë së Arsimit, Shkencës, Teknologjisë dhe Inovacionit, Arbërie Nagavci së fundmi ka folur për situatën e arsimit në Kosovë, si dhe për një nga çështjet më të komentuara në vend, atë të ndalimit të shamisë në shkolla.
E pyetur nëse do ta rishikojnë gjatë këtij viti udhëzimin administrative që ndalon uniformat fetare, ajo tha senuk ka udhëzim administrativ kundër shamisë, teksa shtoi se asnjë vajze nuk i mohohet arsimimi për shkak të shamisë.
“Siç e kam thënë disa herë, nuk ka udhëzim administrativ për shami… Unë kam dy obligime. E para: që vendimet i marrë me përgjegjësi të plotë në interesin më të mirë të institucionit, qeverisë, shtetit tim. E dyta, që të sigurohem si Ministre e Arsimit, si profesioniste, si nënë, si grua që asnjë vajze të mos i mohohet e drejta e shkollimit. Sot që po flasim nuk kemi asnjë vajzë që i është mohuar e drejta e shkollimit”, u shpreh ajo në “Kallxo Pernime”.
Nagavci po ashtu tha se duhet diskutim shumë më përmbajtësor rreth kësaj teme, teksa e pranoi se ka një udhëzim administrativ që ndalon “uniformën fetare”, një togflajësh mbi të cilin bazohen DKA-të kurdo që ndalojnë arsimimin e vajzave me shami në shkolla.
“Diskutimi për këtë duhet të jetë më përmbajtësor. UA-ja i cili ka të bëjë me shkollat e mesme të larta e rregullon mbarëvajtjen e punës në shkollat e mesme të larta. Ndër disa kufizime, dmth e përmend se është e ndaluar uniforma fetare. Tani shoqëria jonë duhet të ketë një diskutim çka është uniforma fetare, a jemi ne të gatshëm të lejojmë që në shkollat tona të kemi vajza e djem të veshura me uniforma fetare”, deklaroi ajo.