Çfarë do të ndodhë tani me pagat e zyrtarëve publikë pasi “Ligji i Pagave” shkoi në Kushtetuese?

Së fundmi është bërë praktikë që ligjet e Qeverisë Kurti pak kohë pas miratimit në Kuvend, të kontestohen në Gjykatën Kushtetuese.

Të njëjtin fat e pati të premten edhe Ligji i Pagave për Sektorin Publik.

Kushtetueses iu drejtua Avokati i Popullit, pas pranimit të mbi 100 ankesave kundër tij.

Ani pse ky institucion vendosi ta kontestojë ligjin në Kushtetuese, nuk është masë pezullimi, andaj rrjedhimisht pagat do të vazhdojnë të dalin me ndryshimet e bëra nga ky ligj.

E, zbritja e pagave që kanë pësuar ngritje nuk është qëllim i Avokatit të Popullit, thuhet në kërkesë.

“Avokati i Popullit nuk e konteston ligjin dhe shtojcat e tij në pjesët kur për sektorë të caktuar ka rritje të pagave dhe ku është ndjekur një qëllim legjitim për rritje të tilla. Avokati i Popullit tërheqë vëmendjen tek qëndrimet e Gjykatës Kushtetuese të shprehura në paragrafin 271 të aktgjykimit KO 219-19 sipas të cilit çdo ulje e pagave duhet të jetë e tillë që të mos e vë barrën e shkurtimit të pagës vetëm në disa persona ose sektorë të caktuar të sektorit publik. Arsyet për ulje pagash duhet të jenë shumëfish më të qëndrueshme se sa arsyet për rritje pagash”, ka thënë Avokati i Popullit.

Megjithëse masa e përkohshme nuk është kërkuar, gjykata mund të ndërmarrë një vendim të tillë, sipas Institutit të Kosovës për Drejtësi, të cilët kanë qenë një nga palët ankuese.

“Kjo nuk do të thotë që Gjykata Kushtetuese, gjatë vlerësimit të kërkesës, nëse e sheh të arsyeshme mund ta pezullojë, ligjin në tërësi ose pjesë të caktuara të ligjit ku ajo vëren se është e arsyeshme që mos të bëhet një dëm i pariparueshëm, për të punësuarit në sektorin publik në Kosovë”, ka deklaruar Naim Jakaj nga IKD.

Nga ana tjetër avokati Florim Shefqeti, që gjithashtu ka përfaqësuar palë ankuese për Ligjin e Pagave, shprehet i bindur se atë do ta rrëzojë Kushtetuesja.

Shefqeti thotë se kërkesën për masë pezullimi, Avokati i Popullit mund ta bëjë ndërkohë.

“Ky ligj e ka cenuar pavarësinë e gjyqësorit, që është shtyllë dhe ne vazhdimisht e kemi thënë se ky ligj në formën që është gjithsesi do të dalë antikushtetues, në pjesën që është bërë cenimi i të drejtave nga pjesa e barazisë ligjore dhe Avokati i Popullit e ka interpretuar si cenim i të drejtës në pronë sepse pagat e tyre janë konsideruar si interes ekonomik, respektivisht si lloj i pronës”, ka thënë Florim Shefqeti Avokat.

Ligji për Paga është miratuar në Kuvend në shkurt të këtij viti, ku vlera e koeficientit është përcaktuar 105 euro.

Leave a Reply

Your email address will not be published. Required fields are marked *