Kosova ka mësuar kundërshtarët e grupit për kualifikueset e Kampionatit Evropian 2024.
“Dardanët” do të jenë në Grupin I, së bashku me Zvicrën, Izraelin dhe Rumaninë, Bjellorusinë dhe Andorën.
Rumania është njëri nga shtetet evropiane që nuk e njeh pavarësinë e Kosovës.
Politikani rumun, Teodor Melescanu ka ngritur këtë çështje, duke thënë se nuk duhet të luhet ndaj Kosovës për faktin se nuk e njohin pavarësinë e vendit.
“Kosova nuk është e pranuar nga një numër i shteteve, përfshirë edhe ne, Rumaninë. Ne nuk e kemi njohur kurrë pavarësinë e Kosovës. Normalisht, ajo që mund ta bëjmë ne për momentin është që Federata e jonë e Futbollit, përmes Razvan Burleanu, të diskutojë me shtetet tjera që gjenden në pozicion të njëjtë me Rumaninë dhe së bashku ta gjejnë rrugën, e cila nuk do ta shkatërronte sistemin tonë, që të mos i shkelim dhe t’i shpërfillim gjërat që janë mjaft të qarta në pikëpamjen e Rumanisë. Për këtë, do të thosha që Federata Rumune ta gjejë një zgjidhje. Nëse jo, ajo që mund ta bëjë është… që të humbë 0:3 nga Kosova. Le të mos paraqitemi në lojë ndaj Kosovës”, deklaroi Melescanu për “Antena 3”.
